LEGAZPI CITY—Duwang indibiwal an nairido makalihis an nangyaring insidente nin pananaksak sa banwaan kan Claveria, Masbate.
Segun ki Claveria MPS COP PMAJ Alfredo Lastrella Jr., sa intrevista kan Bombo Radyo Legazpi, an mga biktima iyo an magpinsan na pigmidbid na sinda Jessie asin Joseph, mantang an suspetsado pigmidbid sa alyas na “Rolly.”
Susog sa saindang imbestigasyon an duwang magpinsan gikan sa kabulodan para magkopra, asin kan sinda pababa na digdi na ninda nasabatan an suspetsado, na kun saen ini nasa impluwensya suboot nin bugsok na likido.
Dugang digdi na kan pakahiling kan suspetsado sa enot na biktima na si Jessie, kinugos niya ini asin pinagsasaksak sa likod an biktima gamit an balisong.
Alagad kan pigtatabangan na man kan pinsan na si Joseph an biktima, sinaksak man ini suboot kan suspetsado, asin tinamaan sa may parteng daghan asin sinabayan nin itak sa kamot.
An duwang biktima dinara sa district hospital kan Claveria, alagad an enot na biktima na si Jessie nagin malala an nasuprir na lastro kaya ipigdara ini sa sarong hospital sa probinsya kan Albay para matawan nin magkakanigong atensyong medikal.
Susog man sa agom ni Jessie na may dating iwal suboot an biktima asin an suspetsado, kun kaya kan nagkasabatan an duwa asin huli na man sa impluwensya kan arak posibleng nagbalik sa memorya kan suspetsado an dae ninda pagkasinabutan rason para gibohon kaini an pananaksak sa biktima.
Mientrastanto, sa ngunyan pigpoproseso na kan saindang opisina an mga reklamo na posibleng isunad laban sa suspetsado.
