LEGAZPI CITY—Maabot sa 1,000 mga indibiwal an presenteng nakaebakwar pa sa ngunyan huli sa namamateang mga pag-uuran sa rehiyon kan Bicol.
Segun ki Office of Civil Defense Bicol Spokesperson Gremil Naz sa intrevista kan Bombo Radyo Legazpi, an nasambit na mga indibidwal naapektaran kan mga pagbabaha asin landslide na sa presente yaon sa mga evacuation centers o sa saindang mga kapamilya.
Sa ngunyan igwa pang naire-report na flooding incidents sa portion kan 65 na mga barangay sa 20 munisipyo, siring kan Camarines Norte partikular na sa San Jose Panganiban, Labo, Mercedes, San Lorenzo Ruiz, Talisay asin Vinzons.
Mantang sa Camarines Sur iyo an mga munisipyo kan Bato, Buhi, Caramoan, Lagonoy, Libmanan, Milaor, Nabua, Pamplona, Sagñay, San Jose, Sipocot, asin Siruma.
Sa probinsya kan Sorsogon, iyo an mga munisipyo kan Barcelona asin Bulan.
Dugang kan opisyal may nairehistro man na duwang gadan sa kasagsagan kan mga raot nin panahon—saro an gikan sa Irosin, Sorsogon, asin saro sa Pandan, Catanduanes.
Mantang siyam man an nawawara kun saen walo digdi an nawawara puon pa kan Enero 1 asin an saro nadukayan an lawas sa probinsya kan Catanduanes.
Sinabi ni Naz na padagos man liwat an pagkundusir nin search and retrieval operation kan mga otoridad sa mga nawawarang indibidwal.
Susog man sa datos kan OCD Bicol, nairehistro man an anom na partially damaged na mga harong kun saen saro sa San Andres, Catanduanes; lima sa Prieto Diaz, Sorsogon.
Igwa man na 67 na affected road and local bridges sa rehiyon na kun saen an 32 digdi not passable sa gabos na mga behikulo, 21 an not passable sa mga saradit na behikulo, 7 one-lane passable, asin 7 na passable para sa mga light vehicles.
Mientrastanto, pig-engganyar man kan opisyal an publiko na mag-monitor sa kamugtakan kan panahon sa state weather bureau magin man sa mga ahensya kan gobyerno.
