LEGAZPI CITY—Pinangenotan kan Office of Civil Defense Bicol an cluster meeting kaiba Regional Disaster Risk Reduction and Management Council Bicol nganing itukar an posibleng epekto kan paghalangkaw kan presyo nin langis sa nacion.
Segun ki Office of Civil Defense Bicol Spokesperson Gremil Naz, sa intrevista kan Bombo Radyo Legazpi, saindang pinag-olayan an epekto kaini bako sana sa commuters asin paggamit nin mga behikulo, kundi magin an posibleng paghalangkaw sa logistic needs asin food security.
Iprinesentar man kan ibang ahensya de gobierno an saindang mga contigency plans asin preparedness plans huli kan presenteng krisis, siring man an pag-monitor kan mga basic commodities asin produktong petrolyo.
Saro sa mga napag-olayan an planong maggibo nin technical working group kan RDRRMC Bicol nganing idiskotir, i-assess, asin i-analyze an preparedness plans asin magkrear nin worst-case scenario plans.
Sa presente na naggigibo na nin paagi an RDRRMC Bicol nganing mapag-adalan kun ano an mga pwedesir na maimplementar na mga lakdang pag-abot sa worst-case scenario.
