LEGAZPI CITY — Sinierto kan Department of Social Welfare and Development (DSWD) na dae sinda nagbabareawas nin mga expired relief goods sa rinibong evacuees sa apektado kan pag-aalburuto kan Bulkang Mayon asin dekalidad an mga ini.
Segun sa nasambitan na ahensya, mahigot nindang pighihiling an expiration date kan mga produktong ipinapanao ninda partikular na an mga noodles asin de-lata.
Marurumduman na sinierto ni DSWD Officer-in-Charge Emmanuel Leyco sa pagbisita kaini sa probinsya kan Albay na siya mismo an nag-iinspeksyon sa expiration date kan mga ibabarewas na pagkaon.
Dugang pa kan opisyal na papanimbagon kan ahensya an siisay man na mabalo na ribayan kan mga expired na produkto an mga ipapanao sa mga evacuees.
Mientrastanto, segun man sa pahayag kan DSWD Regional Office 5, taong 2020 pa an expiration kan mga relief goods na ipigpapanao ninda.
Kun babalikan, kan nakalihis na semana, ipigreklamo kan sarong evacuee sa banwaan kan Sto. Domingo, Albay an suboot na raot na sadinas na naresibe ninda.
Katakod kaini, tulos man na klinaro kan Municipal Social Welfare and Development Office (MSWDO) kan nasambitan na banwaan na bako hali sa ipinanao nindang relief goods an nasambitan na sardinas huli ta dae sinda nagtao kan dae na pinangaranan na brand kan sardinas.
