LEGAZPI CITY-Nagpaabot nin haros P40-Milyon an Department of Labor and Employment (DOLE) Bicol sa paagi kan Adjustment Measures Program para sa TUPAD asin Micro, Small and Medium Enterprises sa provincia kan Catanduanes makalihis an pananalasa kan Bagyong Uwan.
Segun kay Department of Labor and Employment Bicol Regonal Director Imelda Gatinao, sa intrevista kan Bombo Radyo Legazpi na nagpaabot an saindang ahensya nin asistensya sa gobierno provincial para sa mga munisipyo kairiba na an Bagamanoc, Bato, Caramoran, asin San Miguel na labing naapektaran kan bagyo.
Nagkaigwa man suboot nin pagorolay ngani matabangan an mga micro asin nano business kun sain nasa 15 mga grupo sa Catanduanes an tinawanan nin asistensya.
Obheto suboot kaini na dai tuluyang magsarado an mga saradit na negosyo sa provincia asin mag-krear nin trabaho orog na labing naapektaran ekonomiya sa nasabing banwaan.
Pig-eenganyar man ninda na italaga an nasa P5, 000 na payout kan mga benepisyaryo ngani mag-ikot an saindang kwarta sa paagi kan pagnenegosyo siring man para sa saindang livelihood asin employment sa komunidad.
Dagdag pa kan opisyal na mas magayon an pag-roll back kan saindang mga kwarta kun sain ini an sentro kan saindang mga programa para sa ekonomiya kan Catanduanes na labing nangangaipohan nin tabang.
Mientrastanto, makakaresibe man suboot an iba pang banwaan sa rehiyon kaibanan na an Albay asin Camarines Sur na nagkaigwa nin danyos makalihis an nasabing bagyo.
