Pigklaro ni Department of Justice (DOJ) Undersecretary Jesse Andres na bako tungkol sa crimes against humanity an ipapadarang subpoena kay dating Presidente Rodrigo Duterte.
Ini kun dagos nang magpadara nin subpoena an ahensya sa dating presidente, kasabay kan saindang imbestigasyon mapadapit sa suboot mahiwasan na paggadan kan war on drugs.
Ineksplikar ni Undersecretary Andres, na bilang pagtalima sa ‘due process of law’, kaipuhan na ipaapod an dating presidente en kaso makabilog na an DOJ nin reklamo na posibleng isunad sa dating presidente.
Sa presente padagos an pagtipon kan DOJ nin ebidensya gikan sa National Bureau of Investigastion, Philippine National Police, asin iba pang ahensya para makabilog nin pormal na reklamo.
Mantang sa oras na mabilog an reklamo kaipuhan na ipaapod an kakasuhan para matawan nin tyansa na ipaliwanag an saindang lado.
Dugang kan opisyal na ini an pangenot na rason en kaso ipaapod o papadarahan nin subpoena an dating presidente asin bako huli kan crimes against humanity.
Enot na digdi, ipigrekomendar kan Quad Committee kan Kamara de Representantes an pagsunad nin kaso sa dating presidente asin pirang kaalyado kaini, kasunod kan 13 serye nin hearing.
An pangenot na kasong posibleng isunad ki Duterte iyo an Crimes Against Humanity and Genocide susog na man sa mga nagluwas na ebidensya sa mga serye kan hearing kaini.
