LEGAZPI CITY-Kinumpirma ni Palace Press Officer Claire Castro na si Senate Sergeant-at-Arms na si Mao Aplasca an suboot enot na nagpaputok nin warning shot asin nagbalos an National Bureau of Investigation (NBI) agent sa premises kan Government Service Insurance System sa Senado.
Sa sarong briefing makalihis an nangyaring kariribokan sa senado, ipinaliwanag ni Castro na naghagad nin tabang an GSIS President asin General Manager na si Wick Veloso sa NBI ngani masierto an GSIS building sa tagaw kan tensyon na pig-trigger kan suboot pagdakop ki Sen. Ronald “Bato” dela Rosa.
Mientras tanto, nagbaot an mga NBI agent sa edipisyo kan GSIS mga alas 6 nin banggi.
Kun sain an senado asin GSIS nasa sarong propyedad asin konektado sa paagi nin sarong tulay, na an susi kaini kapot suboot kan Senate Office of the Sergeant-at-Arms (OSAA).
Ipigbuyagyag ni Castro na “Kan mahiling kan OSAA na may mga ahente kan NBI sa GSIS, tulos narisa kan OSAA na naka-gear up na sinda—nakasulot nin vest asin nag-hahanda para sa sarong operasyon.”
Paghistorya ni Castro na kan dulukon suboot ni Aplasca an mga NBI agent asin nagpamidbid, digdi na nagpaputok nin sarong warning shot an nasabing Senate Office of the Sergeant-at-Arms asin nagbalos man an NBI agent.
Pig-asegurar ni Castro na wara man suboot nin ginibong assault an NBI sa senado asin wara suboot na operasyon ngani arestaron si dela Rosa.
Mientrastanto, sinabi ni Philippine National Police Police General Jose Melencio Nartatez Jr., na pig-iimbestigaran na kan Pasay Police Station an kawsa kan mga putok, sa koordinasyon kan Criminal Investigation and Detection Group
