LEGAZPI CITY-Nanindugan si Department of Public Works and Highways (DPWH) Secretary Vince Dizon na kaipuhan tanggalon an Anti-Graft and Corrupt Practices Committee na pig-establisar ni dating Kalihim Manuel Bonoan ngani imbestigaran an suboot mga katiwalian sa flood control projects kan ahensya.
Segun kay Dizon, bako tama na an ahensya mismo an mabusisi sa sadiring opisyal asin proyekto.
Paliwanag man kan kalihim na an bagong liderato kan ahensya an magsasagibo nin pagbusisi sa mga proyekto asin ipapasa an gabos na impormasyon sa independent commission na itinalaga nin President Ferdinand Marcos Jr. ngani imbestigaran an mga iregularidad.
Bago man an pagbaba sa puwesto, inilunsar ni Bonoan an komite sa bisa kan Department Order No. 166, series of 2025, ngani mahiling an mga anomalya sa flood control projects sa manlain-laing parte kan nacion.
Siring man sinabi ni Dizon na dapat igalang an desisyon kan Presidente na magbilog nin independent commission asin digdi dapat isangat an gabos na resulta kan imbestigasyon.
Pighayag man ni Bonoan an bukas siya sa siring kaini na lakdang ni Dizon kun para ini sa ikakarahay kan departamento.
Piglinaw man niya na an Anti-Graft and Corrupt Practices Committee an para magin platform na sumbungan kan publiko kun igwang nahihiling na anomalya sa mga tauhan kan departamento.
Pigsisierto man ni Dizon na tututukan niya an “internal cleaning” o paglilinig sa laog kan ahensya ngani magin maayos an mga operasyon asin maisumite nin honesto an impormasyon sa tamang investigating body.
Plano man kan kalihim na personal na busisihon sa mga masunod na aldaw an flood control projects ngani makakuwa nin mas malinaw na datos dapit sa estado kan mga ini.
