Target kan Department of the Interior and Local Government (DILG) na maipaotob an sarong 911 emergency hotline sa enterong nacion sa laog kan anom na bulan nganing maparikas an pag-aksyon sa mga insidente asin malikayan an kalibungan hale sa manlain-laing hotline numbers kan mga lokal na gobierno.
Sa pagdangog kan propwestong 2026 budget kan DILG, sinabi ni Interior Secretary Jonvic Remulla, na presenteng nasa Phase 1 na an implementasyon kan 911 system.
Sa presente an naipapa-otob na an 911 emergency hotline sa Metro Manila.
Ipapa-otob na man an implementasyon sa Cebu, Ilocos, BARMM, Davao, Negros Island Region, Pampanga, asin Region 8.
Segun pa kay Remulla, “dialect-friendly” an mga 911 call center nganing mas madaling masabutan asin matabangan an mga nag-aapod sa oras nin kagipitan.
Para man sa mga naggigibo nin prank call, kaya na ngonian kan sistema kan DILG na i-flag an mga ini nganing dae na marespondehan kun mag-apod giraray.
Segun sa DILG, nakakaresibi sinda nin 60,000 na apod kada aldaw, asin sa enot na aldaw kan operasyon, 1/3 kan mga ini mga prank calls.
Mientrastanto, naghapot si Senate Finance Committee Chairman Win Gatchalian kun may magkakanigong penalidad sa mga naggigibo nin prank call.
Paliwanag ni Remulla, pig-aayos pa kan DILG an nasabing polisiya huli ta dae pa perpekto an implementasyon kan National SIM Card Registration asin National ID System.
Sa ibong kaini, pigsierto ni Remulla na an target kan DILG iyo na magin operational an 911 hotline sa bilog na nasyon sa laog nin anom na bulan ngani na magkaigwa nin mas marhay, mas marikas, asin mas organisadong emergency response system.
 targets to implement a 911 emergency hotline nationwide within six months to speed up action on incidents and avoid confusion from the various hotline numbers of local government units.){kind=link}