Nagtetenir na saro sa rason kan pagkagadan kan mga Pilipino an helang na diabetes.
Susog sa Department of Health (DOH), basado sa pag-aadal kan Philippine Statistics Authority (PSA) kan nakaaging taon, pang-lima an helang na diabetes na kawsa ka mortality sa nacion.
An pirmehan asin labing pagkaon asin pag-inom nin mahahamis an nagkapira sa rason kan pagkakaigwa nin nasabing helang.
Nagresulta man an mga ini kan mga komplikasyon siring kan atake sa puso asin stroke, pagkabulag o problema sa panghiling siring man an pagkaputol kan bitis o parte kan hawak asin kidney failure.
Nganing maibitaran an komplikasyon kan helang, regular na magpa-glucose testing, ibitaran an matataba, mahahamis, mamantika asin maaskad na pagkaon, mag-exercise nin 30 minuto sagkod sarong oras kada aldaw asin ibitaran an paninigarilyo, vape asin pag-inom nin arak.
Abiso man kan DOH na bantayan an blood sugar asin magkonsulta sa health center.
Ginibo kan DOH an pagiromdom na ini kasabay kan pag-obserbar kan Diabetes Awareness Week.
