Nagsunad nin reklamong graft an grupo kan “concerned Department of Health personnel” sa Office of the Ombudsman kontra ki Health Secretary Ted Herbosa asin 16 na iba pang opisyal huli sa suboot nalustay na P1.4 bilyong kantidad nin mga bulong asin bakuna.
Sa 33 pahinang reklamo, inakusaran kan grupo an sekretaryo asin iba pang mga opisyal nin graft asin serious dishonesty, grave misconduct and conduct prejudicial to public service huli sa pagpalyar na maibarewas an mga bulong kaibanan na HIV antiretrovirals, psychiatric medications asin mga bakuna na pinabayaan na mapaso sa mga bodega.
Segun sa grupo, expired na an P68 million kantidad nin medisina kaibanan an 1.2 milyong cycles kan family planning drugs asin psychiatric injectables, P1.3 bilyong kantidad nin dae nai-deliver na bakuna asin 1.6 milyong tablets kan HIV antiretrovirals.
An pagpalyar suboot na gampanan an saindang trabaho an sarong “dereliction of duty” o pagpapabaya sa mandato asin direktang pagbayolar sa kumpiyansa kan publiko.
Segun sa complainants, naipaaram sa mga opisyal sa sarong executive briefer an overstocking asin mga nakatalaan na magpaso na legacy antiretrovirals (ARVs) para sa HIV medications asin visual list kan gabos na commodities na madali nang mapaso.
Basado sa grupo na imbes na ipaotob an emergency distribution plan, inenot pa kan DOH na hidalion an disposal kan mga bulong ngani na ma-liquidate an stock sain maitago an mga ebidensya.
Katakod kaini, hinagad kan grupo sa Ombudsman na isairarom si Herbosa asin mga co-respondents sa preventive suspension ngani na mapugulan na ma-intimidate an mga testigo o ma-tamper an ebidensiya.
