LEGAZPI CITY — (Update) Nagkaolay na an City Government of Legazpi asin ship captain kan nagsadsad na cargo vessel sa kadagatang sakop kan Brgy. Arimbay sa ciudad sa danyos sa coral reefs huli sa nangyari.
Sa intrevista kan Bombo Radyo Legazpi ki Mayor Noel Rosal, napag-araman susog sa nagin assessment kan Integrated Coastal Resources Management Office, nasa 215 square kilometers kan corals an nadestroso sa pagsadsad kan barko asin aabuton nin P655, 000 an gagastuson sa rehabilitasyon.
Pighahalat na sana ngonian an resulta kan negosasyon urog na ipapaabot pa kan kapitan sa kagsadiri kan barko an napagka-uyunan sa coordination meeting kan LGU kaibanan an Maritime Industry Authority (MARINA).
An ciudad naman an bahala sa proseso kan rehabilitasyon mantang inasegurar na dae man nagcausa nin danyos sa behikulong pandagat an nangyari.
Magigirumduman na kan nakaaging Domingo kan magsadsad an MV Jerlyn Lily hale sa Tacloban City na lunad an copra tangarig na i-deliver sa Legazpi Oil.
