Nagtutubod si House Prosecutor, Rep. Lorenz Defensor na an dae pagbanggit ni Presidente Ferdinand Marcos Jr. sa impeachment trial ni Vice President Sara Duterte sa saiyang ikalimang State of the Nation Address an nagpapahiling kan dae panghihimasok o pakikiaram kan presidente sa umuusad na trial.
Sinabi kaining bastante na an naging pahayag ni PBBM bilang kasimbagan sa November 2024 Zoom Press Conference ni VP Sara kun san gibo kan bise presidente an pagbabanta sa buhay kan presidente.
Dae suboot kaipuhang banggitin pa ni Presidente Marcos sa saiyang public speeches siring kan Ulat sa Bayan, an saiyang saloobin o opinion sa nagpapadagos na impeachment proceedings, nganing dae na ini mabahiran pa nin pamumulitika.
Sa lado kan House Prosecution panel, bako importante kung suportado kan presidente o dae an pag-uusig kay VP Sara, huli bilog an desisyon kan panel na usigin asin litison an bise presidente sa suboot nagibo niyang mga impeachable offense.
Mawot man kan lehislador na saro sa mga nagsisirbing prosecutor, na sa laog kan halipot na panahon an matapos na an impeachment trial laban ki VP Sara.
Mas mainam kun malinaw asin simple sana an presentasyon kan mga ebidensya asin testimoniya kan mga witness nganing mas mapadali na masabutan kan publiko asin kan mga senator-judge.
Sa ibong na banda, nanindugan man si Rep. Defensor na dapat matawan nin bastante na panahon o patas na tyansa an mga kapwa niya lehislador na nasusunadan nin kaso huli sa flood control scandal.
Magigiromdomang enot nang sinunadan nin patong-patong na kaso si Uswag Ilonggo Partylist Rep. Jojo Ang Jr. mantang nabanggit man ni Presidente Marcos na harani nang sunadan nin mga kaso an dating House Speaker’.
Segun ki Defensor, dapat matawan sinda nin tyansa na patunayang sinda inosente kun totoo man na wara sindang kasalan, alagad kun mapatunayang may pagkakasala an nararapat na sinda mapanimbag.
