LEGAZPI CITY – Suminampa na sa 1,816 an kabilugang kaso kan COVID-19 sa Bicol makalihis na madugangan nin 22 panibagong nagpositibo.
Nasa 410 man an mga aktibong kaso.
Susog sa datos hali sa Department of Health Center for Health and Development (DOH-CHD) Bicol, siyam sa mga bagong nagpositibo an hali sa Albay kun sain walo sa ciudad kan Legazpi asin saro sa Daraga; lima man an nadugang sa Camarines Norte partikular na an tulo sa Daet, saro sa Labo asin saro man sa Talisay mantang anom man sa Camarines Sur na duwa an hali sa Baao, asin tigsararo sa Camaligan, Iriga City, Nabua asin Pamplona.
Duwa man an nagpositibo sa Sorsogon kun sain saro sa Gubat asin saro man sa ciudad kan Sorsogon.
Nadugangan man nin siyam an mga naka-recover na sa COVID-19 o nagnegatibo na sa mga kasunod na tests kaya nasa 1, 338 an kabilugang numero.
Nagsakat man sa 68 an kabilugang COVID-19 deaths sa Bicol huli sa sarong nadugang hali sa Camarines Sur.
