LEGAZPI CITY-Ipighayag ni Department of Justice Secretary Jesus Crispin Remulla na saindang iimbestigaran an mga opisyal kan gobierno poon 2016 hasta sa presenteng taon kasunod kan suboot mga anomalya sa flood control projects.
Segun sa kalihim na enot na man na nabanggit na maabot sa 200 katawo an suboot imbuelto sa kontrobersyal na mga infrastructure projects.
Ipigheras man kan kalihim na pigbibilog na an mga kaibang district engineers pati mga contractors na nakakuwa nin proyekto.
Afuera sa mga nabanggit na mga opisyal, kairiba man suboot digdi an mga kongresistang contractor o an pigaapod niyang “cong-tractors”
Dagdag pa kan kalihim na bako na bago an siring na mga kalakaran sa House of Representatives o sa mga kongresista.
Magigiruduman na nasa 200-indibidwal na suboot an imbuelto sa isyu asin 67 digdi an suboot mga “cong-tractors”.
Sinabi pa ni Justice Sec. Remulla, na nakikipagkoordinar na siya kay House Speaker Bojie Dy ngani mapag-olayan an mga kongresistang contractor.
Kasunod kaini, sinabi man ni Remulla na posibleng magin mga opisyal hale sa mga local government units an may koneksyon man sa mga anomalya sa flood control asin infrastructure projects.
