LEGAZPI CITY – Pighahalat na sana kan City Anti-Drug Abuse Council (CADAC) kan Legazpi na maaprubaran an pagkondusir nin community rehabilitation para sa mga drug surrenderers.
Segun ki Ricardo Fontanilla, pamayo kan CADAC, plano nindang magsagibo nin community rehab kun saen an lokal na gobyerno kan syudad kan Legazpi an makapot kaini.
Sa presente, nasa 2,725 an nairehistrong surrenderers kun saen 45 digdi an mga menor de edad.
Sa isinagibo man na rapid screening, nadiskubreng 13 sa mga nagsurindir an nasa malalang kondisyon asin nasa 800 an nasa moderate condition.
Nakipag-olay naman an CADAC sa mental health team kan mga dapat na gibuhon sa surrenderer asin nakagibo naman suboot an CSWD nin mga programa na pwedesir na maitao sa mga magigin pasyente.
Aminado man an opisyal na sa numero kan nagsurindir, kaipuhan man an mas dakulang kantidad nin kwarta ngane na matawanan nin urog na dakulang oportunidad an mga ini.
Segun pa ki Fontanilla, nakapagtao naman sinda nin impormasyon sa mga barangay kapitan ngane na maipadara na sainda an pangaran kan surrenderers na yaon sa kanya-kanyang komunidad.
Naglalaom an opisyal na sa maabot na Maros 15, maitatao na an totalmenteng numero kan mga ini.
Kadakol man suboot na rason kun nata nagsurindir na an mga ini kun saen saro na an pagkatakot.
