LEGAZPI CITY – Pighahalat na sana kan City Anti-Drug Abuse Council (CADAC) kan Legazpi na maaprubaran an pagkondusir nin community rehabilitation para sa mga drug surrenderers.
Segun ki Ricardo Fontanilla, pamayo kan CADAC, plano nindang magkondusir kan community rehab kun saen an lokal na gobyerno kan syudad kan Legazpi an makapot kaini.
Sa presente, nasa 2,725 an nairehistrong surrenderees kun saen 45 digdi an mga menor de edad.
Sa isinagibo man na rapid screening, nadiskubreng 13 sa mga nagsuko an nasa malalang kondisyon asin nasa 800 an nasa moderate condition.
Nakipag-olay naman an CADAC sa mental health team kan mga dapat na gibuhon sa surrenderer asin nakagibo naman suboot an CSWD nin mga programa na pwedesir maitao sa nagsuko na makakatabang para sa mga ini.
Aminado man an opisyal na sa numero kan nagsuko, kaipuhan man an mas dakulang kantidad nin kwarta ngane matawan nin mas dakulang oportunidad an surrenderers.
Segun pa ki Fontanilla, nakapagtao naman sinda nin impormasyon sa mga barangay kapitan ngane na maipadara na sainda an pangaran kan surrenderers na nasa komunidad pa.
Naglalaom an opisyal na sa maabot na Maros 15, maitatao na an totalmenteng numero sa listahan kan surrenderers na nasa barangay pa.
Dugang kaini, kadakol na rason kun nata nagsuko na an mga ini kun saen saro na digdi an pagkatakot.
