LEGAZPI CITY—Pigklaro kan Coast Guard District Bicol na an nahiling na foreign vessel sa may parte kan Caramoran, Catanduanes sarong bulk carrier vessel asin bako sarong cruise ship.
Segun ki Coast Guard District Bicol PIO, Ensign Alyssa Novie Bermal, sa intrevista kan Bombo Radyo Legazpi, an nasambit na vessel may ngaran na M/V NEVA na may International Maritime Organization (IMO) No. 9213753 na sarong bulk carrier na naglalayag sa irarom kan bandera kan Marshall Islands, asin nakarehistro sa irarom kan Bay Shipping and Trading Inc.
May lunad man ini nin mga tripulanteng Turkish.
An nasambit na vessel piggamit para sa pag-load asin unload nin mga kargamento asin paramientras na nagtenir nin duwang may kabanga na aldaw sa baybayon kan nasambit na lugar huli kan maraot na panahon.
Napag-araman na kan Enero 27 nag-agi an vessel sa Caramoran asin pasiring sa Ningde, China.
Naghali na an M/V NEVA sa naunambitang lugar kan Enero 29, asin pigdagos na an adjusted course kaini.
Dugang kan opisyal na padagos man an pag-monitor kan ahensya sa mga nasambit na kadagatan, asin sa ngunyan wara pa man na nahihiling na foreign vessels na nagtetenir sa Catanduanes asin iba pang karatig na mga lugar.
Mientrastanto, nagpagiromdom man si Bermal sa publiko na bilang pagsuporta sa seguridad asin kaayusan sa mga pantalan magin kadagatan na yaon an saindang ahensya para magtao nin serbisyo publiko.
