LEGAZPI CITY — Kinumpirmar ni Legazpi City Mayor Noel Rosal na nakapagpadara naman an city government nin tabang para sa mga residenteng naipit sa pagbungkaras nin kariribukan sa pagultanan kan tropa kan gobyerno asin local terror group na Maute.
Nagpadara na nin P200, 000 na cash grant an ciudad mientras na nagtao man nin parehong kantidad an Provincial Government kan Albay.
Enot nang tinukar ni Rosal an nasabing impormasyon kasuodma sa ikinondusir na Regional Peace and Order Council meeting kun saen ini man an namamayo.
Kaibanan sa mga nagin highlight kan kabilugang pag-oorolay an mga concern sa preparasyon katakod kan nangyari sa Marawi, paglaban sa iligal na droga urog na sa report sa sitwasyon kan PNP asin rehabilitation sa labi sa 80, 000 na drug surrenderees na klasipikado bilang severe, moderate asin less affected.
Present man sa pagtiripon si National Bureau of Investigation Dir. Dante Gierran na nagheras kan mga isyu dapit sa peace and order asin modernisasyon sa ahensya.
