Kinumpirma kan Philippine Coast Guard na nagpadara an China nin amphibious assault ship sa West Philippine Sea.
Segun kay Commodore Jay Tarriela an tagapagtaram kan Philippine Coast Guard para sa West Philippine Sea, nahiling sa saindang pagpapatrolya an sarong Type 075 landing helicopter dock kan People’s Liberation Army kan China harani sa Subi Reef.
Nagtutubod an opisyal na misyon kaini na mapugolan an pagrani kan mga barko kan Pilipinas partikular na an mga siyentistang Pilipino na nagsasagibo nin pag-aadal sa Escoda Shoal.
Enot na kayang nadiskubre kan mga siyentistang Pilipino an pagtatambak kan China nin mga gadan na korales sa shoal na indikasyon na plano pa ining patugdokan nin artipisyal na isla.
Huli digdi, inasegurar ni Tarriela na mas papahigoton pa an pagbabantay sa teritoryo kan Pilipinas asin dae tutugotan na may maagaw pa an China.
Nangapudan man an Philippine Coast Guard sa China na irespeto an international law asin pundohon na an mga agresibong lakdang na nagpapalala kan tensyon sa West Philippine Sea.
