LEGAZPI CITY – Padagos na nangrarapado sa provincia kan Catanduanes si Super Typhoon Uwan.
Segun ki Catanduanes Provincial Disaster Risk Reduction and Management Office Emergency Operations Section Chief Roberto Monterola sa intrevista kan Bombo Radyo Legazpi na magkahalong makukusog na paros asin uran an saindang namamatean ngonian.
May mga naresibi na man sindang report mapadapit sa mga munisipalidad na binaha mantang padagos man nindang pigrerespondehan an saindang mga namamanwaan na nagahagad nin tabang.
Alagad paglilinaw niya man na may mga dae sinda marespondehan partikulamente na an mga nasa hararayong parte kan provincia huli ta abo man ninda na isugal an buhay kan saindang mga personahes.
Pigtaram pa kan opisyal na magserbing leksyon an mga siring kaining pangyayari asin amay nang mag-ebakwar enkaso igwang raot nin panahon na makaka-apektar sa isla provincia.
Basado man sa saindang obserbasyon, nagpoon na mamatean an epekto kan raot nin panahon poon pa kan alas tres nin maagahon asin dae pa nagpupundo sagkod ngonian urog nang igwa nin landfall scenario sa provincia kan Catanduanes.
Pagladawan niya pa na kaya suboot na padapaon an sarong harong na gibo sa light materials kan kusog kan paros na saindang namamatean ngonian.
Pighayag man ni Monterola na sa presente an wara nang supply nin kuryente sa provincia kan Catanduanes mantang may mga nagkapira man na munisipalidad an wara nang linya nin komunikasyon huli sa pigsagibong preventive shutdown kan mga telco company.
