LEGAZPI CITY- Palaban man giraray an mga delegado kan Catanduanes sa Palarong Bicol 2017 sa ibong kan pagpugol sainda na magbale huli sa nagin epekto kan bagyong Nina.
Katakod kaini, nagpadagos an 117 atleta kan saindang delegasyon pasiring sa syudad kan Legazpi ngani na makipagkompetensya sa manlaen-laen na sports.
Sigon ki Socoro Dela Rosa, an DepEd Schools Division Superintendent kan Catanduanes, maski sinda an igwa nin pinakadiit na atleta, pigigibo ninda an saindang gabos na makakaya ngani na manggana asin makipagsabayan sa ibang delegasyon.
Sa presente, sinabi ni Dela Rosa na igwa na sinda nin 3 gold medals sa special events kan Palaro.
Huli digdi, tatawanan suboot nin asistensya an mga nangganang atleta ni Catanduanes Governor Joseph Cua.
Mientrastanto, sinabi man kaini na 439 na classroom an nadistroso ni Nina sa saindang probinsya asin igwa na man nin mga nagkapirang natugdukan nin Temporary Learning Structure (TLS.)
Magigirumduman na an Catanduanes an nagin pinakasentro kan nakalihis na makusog na bagyo kun sain nag-sakat sa signal number 4.
Kun kaya, dakula an kaogmahan kan nasambitan na delegado huli ta dae nasayang an saindang pagpirit na makabale sa taunan na Palaro.
