LEGAZPI CITY – Tulong partikular na punto an rason ni Camarines Sur Representative Gabriel Bordado kun nata sya nagboto nin “NO” sa ika-tulo asin huring pagbasa kan death penalty bill sa Kamara kasuudma.
Nanindogan si Congressman Bordado sa saiyang tulong prinsipyo na enot iyo an pagpirma kan Pilipinas sa International Covenant na Civil and Political Rights na an boot sabihon, dae dapat na ibalik kan Pilipinas an padusang kagadanan.
Panduwa, bako man suboot deterrent an death penalty sa krimen urog pa na wara man nin naipresentar na datos ngani na mapatotoohan na nakakaresolbar ini sa krimen.
Pantulo, an saiyang pagtubod bilang sarong Katoliko kun sain tinawan duon ni Bordado na nagtutubod syang solamenteng an Diyos sana an may poder na magkua kan buhay kan tawo.
Ineksplikar kan opisyal na haros sarong bulan syang nagsagibo nin survey asin focused group discussion sa saiyang mga constituentes ngani na maaraman kun ano an paninindogan kan mga ini dapit sa propuesto.
Ano man suboot an saiyang nagin simbag sa Kamara, iyo man an kamawotan kan mga ini bilang sya an representante kan mga kahimanwa sa distrito.
Sinabi pa ni Bordado na preparado syang mahalian nin posisyon bilang Vice-Chairman kan Bicol Recovery and Development asin kan Public Accountability and Good Governance huli sa saiyang nagin desisyon sa ibong kan huma ni House Speaker Pantaleon Alvarez na hahalian nin pwesto an mga makontra asin ma-abstain sa final reading kan death penalty.
Mientrastanto, inomaw man kaini an parehong kongresista na si Albay Rep. Edcel Lagman huli sa pusog suboot kaining paninindogan asin pagigin matibay na pulitiko.
