LEGAZPI CITY-Nagsangat nin reklamo si Atty. Manases Reyes Carpio, an agom ni Vice President Sara Duterte sa Quezon City Prosecutor’s Office laban sa mga opisyal kan Bangko Sentral ng Pilipinas (BSP), Anti-Money Laundering Council (AMLC), asin iba pang representates kan Kamara.
Kabale sa mga pinangaranan sa reklamo si BSP Governor Eli Remolona Jr., AMLC Executive Director Ronel Buenaventura asin mga miyembro kan Kamara na sinda Representatives Gerville Luistro, Percival Cendaña, Chel Diokno, asin Leila De Lima.
Basado sa kampo ni Carpio, may kinaaraman an reklamo sa suboot pagbayolar sa Anti-Money Laundering Act, Bank Secrecy Law asin Data Privacy Act.
Inakusaran niya an mga opisyal kan suboot iligal na pagbuyagyag kan “classified confidential banking records” na protektado kan ley.
Sinabi kan saiyang kampo, na nawaran siya nin pagkakataon na makapagsangat nin ligal na depensa para sa saiyang sadiri, pamilya asin magin sa banking community.
Nabanggit man kan saiyang abogado na dai sakop kan reklamo an katotohanan kan mga ipinaluwas na “suspicious transactions” sa House Justice Committee, alagad nakasentro sana sa suboot pagbalgar sa ley.
Sa pagdangog, nai-report kan AMLC na labi sa P6 bilyon an mga transaksyon na konektado ki Carpio asin kay Vice President Sara Duterte, kabale an P4.525 bilyon na naglaog sa saindang accounts, P1.554 bilyon na naipaluwas digdi, asin P791 milyon na dai madeterminaran kun inflow o outflow.
Inapod ni Carpio ini bilang “black propaganda” asin “political harassment” na may katuyuhan suboot na raoton an reputasyon kan pamilyang Duterte.
Idinagdag pa kan saiyang legal counsel kaini na sarong pribadong indibidwal si Carpio asin bako man parte kan impeachment proceedings.
