LEGAZPI CITY- Padagos na nagigin atraksyon an mga butanding sa Barangay San Lorenzo, syudad kan Tabaco.
Pebrero ngunyan na taon kan liwat na manotaran ini sa lugar na nagin instant attraction sa mga turista sa probinsya kan Albay.
Sigon sa Bureau of Fisheries and Aquatic Resources (BFAR) indikasyon ini na malinig pa an tubig sa lugar.
Tuyong Disyembre hasta Marso suboot nagbibisita an nasambitan na mga hayop sa kadagatan kan Tabaco ngani na maghanap nin pagkakan.
Alagad base man sa pahayag kan Department of Tourism (DOT) Bicol, dae ini matatawanan nin pondo huli ta paminsan-minsan man sana ining nagdadayo.
Sa ibong kaini, sinabi ni San Lorenzo Barangay Captain Tope Brutas na nagtao nin diit na pondo an city government para sa nagpapadagos na atraksyon kan butanding.
Nakabantay man suboot an Philippine Coast Guard asin opisyales kan barangay ngani na masiertong nasusunod kan mga naghihiriling digdi an ipigpapa-utob na do’s and dont’s kan BFAR arog kan pag-ibitar sa pagdulok sa mga hayop ngani na dae ini ma-stress.
Pigkokonsidirar ining swerte kan mga residentes kan San Lorenzo huli na man sa pagbisita kan mga turista.
Kun babalikan, Pebrero 2015 kan mapasiring sa syudad an tulong butanding na nagtinir nin pirang aldaw.
