LEGAZPI CITY- Nakikipag-coordinar na an Legazpi City Public Safety Office sa Land Transportation Office (LTO) sa ciudad tangarig na mabisto asin matawanan nin magkakanigong aksyon an sarong bus na nagtapok kan ati hali sa portable comfort room sa parte kan Imelda Roces Avenue kan Brgy. Cruzada.
Ipinaabot kan sarong netizen an reklamo makalihis na maaktuhan an bus na nagtapok kan CR waste diit sana an distansya sa may hotel, mantang ini an naglalakaw-lakaw sa parte kan tinampo kaibanan an ataman na ayam bandang alas-9:00 kasubanggi.
Sa intrevista kan Bombo Radyo Legazpi ki City PSO head Rolly Esguerra, pigpapa-trace na suboot ni LTO Legazpi chief Grace Rojas an mga nag-abot na bus sa terminal kan nasabing oras.
Magin an PSO an nagre-review naman kan CCTV footages sa nasabing oras tangarig na makua an plaka asin pangaran kan driver kan bus.
Tinawang-duon ni Esguerra na dapat na magin “eye opener” an insidente na sala an ginibo kan bus urog na sibilisadong lugar an Legazpi asin dapat na sa CR na sana kuta kan terminal dapat na ipigtapok an ati.
Mientras tanto, pinasalamatan man ni Esguerra an netizen na nagpost kan nasabing reklamo.
