LEGAZPI CITY – Nauli sa trahedya an maogmang bakasyon kan sarong British national makalihis na malamos sa banwaan kan Oas, Albay.
Binawian nin buhay an Briton na si David Andrew Smith Wilmot, 57-anyos na hale sa England mantang nagkakarigos sa harani sa sarong beach resort sa Brgy. Maramba kan nasabing banwaan.
Sa ekslusibong intrevista kan Bombo Radyo Legazpi ki PStf/Sgt. Romy Galario, imbestigador kan Oas Municipal Police Station, nagbisita sana suboot si Wilmot sa lugar kan amigang si Joan Omaga mantang nagpaaram na makarigos sana sa dagat.
Nagkapirang minuto an nakalihis, nagkurahaw na an tiyuon ni Joan na nalamos an dayuhan.
Idinalagan pa man sa ospital sa kataid na banwaan kan Libon an dayuhan alagad ipigdeklarar nang dead on arrival (DOA) kan doktor.
Sa istorya man ni Joan, taong 2011 kan enot na magpasiring sa Pilipinas an Briton hasta kada summer na nagbabakasyon.
Igwa man suboot na nakakabit na ‘pacemaker’ o ekipahe harani sa may puso kaini na nagsusuporta sa paghangos kan dayuhan.
Sa presente, nakipagkoordinar naman an pulisya sa Bureau of Immigration (BI) sa paghahanap sa pamilya ni Wilmot mantang isasairarom man sa autopsy an bangkay kaini.
