LEGAZPI CITY – Naka-eksperyensya nin abot liog na pagbabaha an mga residente kan Brgy. Cabagñan West, Legazpi City nin huli sa warang patod na pag-uuran na dara kan raot nin panahon.
Segun kay Ma. Jo Arroyo, kagawad kan naunambitang barangay sa intrevista kan Bombo Radyo Legazpi na dae nakaagi an mga saradit na behikulo nin huli sa halangkaw na lebel kan tubig.
Maagahon pa sana suboot an pigbabaha na an saindang barangay nin huli sa nag-apaw na salog asin dae na nagpundo hasta sa magdamlag.
Amay man nindang inabisuhan an saindang nasasakupan na tulos mag-ebakwar asin mag-sakat sa mga haralangkaw na pasilidad enkaso maghalangkaw pa an lebel kan baha na kawsa kan warang patod na pag-uuran sa saindang barangay.
Pigtaram pa kan opisyal na duwang pamilya sana an nag-ebakwar sa saindang barangay hall nin huli ta nagtenir an iba sa saindang mga pagrugaring na halangkaw an pigtugdukan kan mga kaharongan.
Ipigpasalamat kaini na wara mang nairehistrong nadanyaran sa nangyaring pagbabaha nin huli ta pig-asigurar kan Barangay an seguridad kan mga residentes asin an warang patod nindang pag-tabang sa saindang nasasakupan.
Nagtetenir na naka-standby an saindang mga Barangay disaster risk reduction members nganing tulos na makaresponde sa saindang nasasakupan sa panahon nin emerhensya.
Syesyertuhon man kan saindang Barangay na tutugutan nindang magbalik an mga residente sa saindang kanya kanyang kaharongan sa oras na maghupa na an pagbabaha.
Pangapodan ni Arroyo sa publiko na mag-ingat an gabos asin dae na makidunungan pa partikular na kun pigpapa-ebakwar nin huli ta piggigibo man kan Barangay an gabos nganing magin ligtas an saindang sitwasyon.
