LEGAZPI CITY- Pinaglalaoman na mapuon na sa bulan kan Disyembre an operasyon nin bagong ruta sa Bicol International Airport.
Segun ki Bicol International Airport Operations Manager Roland Bocito sa intrevista kan Bombo Radyo Legazpi na nagpapadagos ngunyan an koordinasyon sa mga airline companies.
Enkasong dagos na maging operational an ruta haling Bicol International Airport pasiring sa Iloilo City asin vice versa, itatalaan an schedule kan flights tuyong Lunes, Miyerkules asin Biyernes.
Sa presente nakahanda na suboot an airport facilities asin naghahalat na sana sa mga pasahero asin kliyente na mawot na magbiyahe.
Segun pa sa opisyal na parehong safety protocols man an ipapaoton sa bagong ruta ngani na masierto an seguridad kan mga pasahero.
Mientras tanto, katakod kan bagong ruta sinabi ni Bocito na pinaglalaoman na mas mapapakusog an connectivity sa mga rehiyon sa nacion huli ta sa presente konektado sana an Bicol International Airport sa Metro Manila asin Mactan, Cebu.
Kumpiyansa man an opisyal na mas magpapakusog pa ini sa turismo kan provincia asin pagpapatalubo kan ekonomiya kan Albay.
