LEGAZPI CITY – Proud na proud an sarong local designer haling Catanduanes makalihis na manggana an saiyang National Costume sa Coronation Night kan Ginoong Pilipinas.
Ini an abaca inspired national costume na inirampa ni Ron Madrigal sa kompetisyon.
Sa intrevista kan Bombo Radyo Legazpi sa designer na si Joven Ombos Añonuevo, sulit an duwang bulan na pagpapagal sa pag-iisip, paghahanap nin materyales asin pagdesinyo sa national custome na korteng paso ay may desinyo pa ni Nuestra Señora de Salvacion.
Napag-araman na nasa P30,000 sana an kabilugang gastos sa nasabing obra.
Segun kay Añonuevo, abaca an saindang napili na materyales sa custome ngani na maipabisto sa publiko an industriya na nagtatao nin trabaho sa kadakol na mga Catanduanes.
Naglalaom si Añonuevo na apwera sa honra, makakatabang man an nakuang award ngani na mas dakol pa an magtangkilik sa abaca.
