LEGAZPI CITY- Inasegurar kan Philippine National Police (PNP) an paglalatag kan ‘supisyenteng tropa’ sa Bicol na ipigkokonsiderar na ‘priority region’ katakod kan paparaning Barangay asin Sangguniang Kabataan (SK) elections.
Tinawang-duon ni PNP spokesperson PC/Supt. John Bulalacao sa ekslusibong intrevista kan Bombo Radyo Legazpi an mahigot na pagbabantay sa rehiyon tangarig na maasegurar na credible na resulta kan eleksyon siring man an seguridad kan publiko.
Segun pa ki Bulalacao na Bicol pa man giraray an nangengenot sa labi sa 1,000 election watchlist areas na ipigkoonektar sa mga factors siring kan mahigot na political rivalry, presensya kan private armed groups, aktibidad kan mga criminal gangs, paglakop kan loose firearms siring man an threat groups.
Pighihiling man na ‘dynamic’ o pwede pang magbago an nasabing numero na nakadepende sa magigin sitwasyon kan mga lugar sa nasyon.
Sa ngonian, pighahalat pa kan PNP an isasagibong validation kan Commission on Elections (COMELEC) dapit sa rekomendasyon na ikaag “under control” kaini an provincia kan Masbate.
