BI, naalarma mapadapit sa 2nd batch kan mga Chinese nationals na nagbalong lumuwas kan nacion sa paagi kan ‘backdoor’ 

Naalarma an Bureau of Immigration makalihis makatanggap nin report mapadapit sa panibagong pagbalo nin mga blacklisted foreign nationals na tuminakas sa nacion sa paagi kan “backdoor,” sakay kan sarong bangka sa Tawi-Tawi.

Segun kay Bureau of Immigration Commissioner Joel Anthony Viado, inarestar kan mga operatiba kan intelligence unit kan ahensya an duwang Chinese nationals na binistong sinda Li Yu, 27 anyos, asin Liu Fei, 35 anyos, makalihis sindang sitahon kan Maritime Police Station kan Tawi-Tawi.

Sa saindang pagmamanman, nadukayan kan grupo an duwang Chinese na lalaki na sakay kan sarong barkong nag-abot hale sa Zamboanga City.

Ipinabisto ninda an saindang sadiri gamit an mga ladawan kan saindang pasaporte asin sinabing naka-istar sinda sa Parañaque.

Nakipag-koordinar an monitoring team sa mga operatiba kan BI nganing beripikahon an identidad kan duwa, asin nakumpirma na an saindang mga pangaran an nasa blacklist kan BI makalihis sindang ikonsidera kan 2023 bilang undocumented and undesirable aliens huli sa pagtatrabaho sa sarong establisyimentong imbwelto sa prostitusyon asin labor exploitation.

Pareho man sindang binisto kan gobierno kan Tsina bilang mga pugante, huli ta nahahampang sinda sa mga kaso kan financial fraud sa saindang nacion.

Inilipat sinda sa pasilidad kan BI sa Taguig kun saen sinda matenir mantang pighahalat an saindang deportasyon.