LEGAZPI CITY—Huli sa amay na paglansar kan “Oplan Paalala: Iwas Paputok” kan Bureau of Fire Protection Region V, warang nairehistrong kasulo na may kinaaraman sa paggamit nin paputok an Bicol sa pag-obserbar kan holiday season.
Segun ki Bureau of Fire Protection Region V Acting Regional Director Fire Senior Superintendent Achilles M. Santiago, sa intrevista kan Bombo Radyo Legazpi, amay nindang ipinaotob an programa sa paagi kan paglilibot kan mga fire trucks sa kada barangay sa rehiyon na nagpapagiromdom sa namamanwaan na maglikay sa paggamit nin paputok.
Dakula man an nagin tabang asin esfuerso kan lokal na gobierno magin kan kapulisan nganing maibitaran an mga kasulo sa paagi kan mahigot na pagbabantay sa mga pigtitindang paputok asin pagbugtak nin designated areas sa fireworks display.
Dugang kan opisyal na nakapagrehistro sinda nin 645 na insidente nin kasulo kan 2025 kun saen kadaklan digdi an huli sa dae nabantayan na mga kandila o pailaw, panduwa an sa electrical, asin pantolo an huli sa pagluluto.
Mientrastanto, abiso man ni Santiago sa mga kapwa opisyal kan BFP na ipadagos an saindang napuonan na magayon na obheto nganing mamantinir an magayon na imahe kan saindang ahensya siring na man makapaghatod nin serbisyo publiko.
