LEGAZPI CITY – Padagos an pigsasagibong intensified monitoring kan Bureau of Fisheries and Aquatic Resources (BFAR) Masbate sa katubigang sakop kan banwaan nin Milagros kan kaparehong provincia makalihis na magpositibo sa paralytic shellfish toxin an mga nakolektar na shellfish samples digdi kan mga nakaaging aldaw.
Segun ki BFAR Masbate Provincial Fisheries Officer Geralph Andrade sa intrevista kan Bombo Radyo Legazpi na nag issue na sinda ki local warning nin huli ta padagos pa an saindang pag monitor mapadapit sa level kan toxin.
Paramientras muna nindang pigbabawal sa naunambitang kadagatan an pagdakop, pagpabakal asin pagkakan kan ano man na klase nin shellfish talaba, tahong, scallops asin iba pa.
Pigtaram pa kan opisyal na mahigot na man suboot an pagbabantay kan mga otoridad sa nasabing munisipalidad sa pagpapaotob kan ordinansa sa pagbabawal sa pag-consume kan mga shellfish asin nagpatanid na may kasabay ining penalidad sa kun sisay man na madadakop.
Sa presente an nagfocus muna an mga nagkukuwa nin shellfish sa pagdakop nin mga sira nganing magkaigwa sinda nin paramientras na makukuwaan nin ganansya.
Pigdugang man kaini na makondusir sinda nin panibagong test nganing maaraman kun igwa pang toxin nin huli ta kalimitang nagkakaigwa nin kontaminasyon an kadagatan kan milagros kada masapit an bulan kan Enero.
Kaiba sa mga pwedesir mamatean kan makakaon nin mga shellfish na may toxin iyo an pagsususka, pagkahilo asin pwedeng mauli sa pagkagadan.
Pag-asigurar kaini na mahigot nindang pighahagadan nin mga magkakanigong dokumentos an mga shellfishes na pigbabagsak sa masbate na gikan sa manlain-laing provincia nganing masyerto an kaligtasan kan saindang nasasakupan.
