LEGAZPI CITY—Pormal nang inagurahan an ika-103 na Balay Silangan sa rehiyong Bicol asin ika-15 sa provincia kan Albay sa Barangay Anislag, Daraga, Albay.
Segun ki PDEA Albay Provincial Director Noe Briguel, sa intrevista kan Bombo Radyo Legazpi, na an Balay Silangan sarong reformatory intervention center para sa mga indibidwal na imbuelto sa pagpapabakal nin ilegal na droga na mawot nang magbagong buhay.
Nakabugtak digdi an mga piggigibong intervention sa mga benepisyaryo siring kan rehabilitation, livelihood programs, trainings asin seminars siring man an pagtabang sa pamilya ngani na magin legal na an trabaho kan saindang kapamilya na naimbuelto sa pigbabawal na droga.
An nasambit na lakdang sarong esfouerso kan lokal na gobierno kan Daraga sa pakikipagkoordinar sa mga nagkapirang ahensya nin gobierno ngani na makatabang sa mga personang imbuelto sa pagpapabakal nin droga.
Mientrastanto, nangapudan man an opisyal sa mga padagos na naggagamit asin nagpapabakal nin ilegal na droga na pwedesir sindang magpasiring sa barangay anti-drug abuse councils ngani na matabangan sinda kun ano an mga paagi para mapundo na an saindang paggamit kan naunambitang ilegal na droga.
