LEGAZPI CITY—Sarong bagong pangaking omboy na babaye an nadukayan sa may baybayon kan Aroroy, Masbate.
Segun ki 1st PMFC Team Leader Revitalized-Pulis sa Barangay Police Corporal Reymart Briol, sa intrevista kan Bombo Radyo Legazpi, duwang aki an nakapag-report sa mga kapulisan kun saen naagihan ninda an sarong omboy na naghihibi sa nasambit na baybayon.
Tulos man na nirespondehan kan mga otoridad asin nakumpirmar na may sarong bagong pangaking omboy na babaye an nakapatos sa kolor asul na lampin asin piglalanggam na.
Dinara ini sa health center para linigan asin tinangkasan nin pusod, asin dineretso man ini sa ospital sa sentro Aroroy para ma-check up kan mga espesyalista.
Dugang kan opisyal na dakol sindang nahiling na gamit sa pinanghalian kan omboy magin an inulnanan kaini, asin posible man suboot na digdi na ini ipinangaki.
Sa presente, an omboy nasa pangangataman na kan Municipal Social Welfare and Development Office kan Aroroy LGU.
Padagos pa sa ngunyan an imbestigasyon kan mga otoridad mapadapit sa insidente.
Mientrastanto, nangapudan man si Briol sa publiko na kun may aram sinda na mapagkukuahan nin impormasyon dapit sa insidente na makipagkoordinar sa saindang opisina.
