LEGAZPI CITY—Arestado an sarong lalaki makalihis na magpabakal nin badil sa ikinundusir na gun buy-bust operation kan mga otoridad sa banwaan kan Daraga, Albay.
Naarestar an suspek sa pinagsarong operatiba kan Daraga Municipal Police Station asin 2nd Albay Provincial Mobile Force Company.
Binisto an suspek na si alyas “Antet”, 43-anyos, asin residente kan nasambitang banwaan.
Naarestar an suspek makalihis na makipagtransaksyon sa sarong poseur-buyer asin ipabakal an sarong cal. 45 pistol TM COLT COMMANDER .45 na may serial number V135927 na may naka-insert na magazine asin pitong live ammunition nin Cal .45 karibay kan P5,000 na buy-bust money.
Afuera digdi, nakumpiskar man sa suspek an duwang heat-sealed transparent plastic sachet na may laog na white crystalline substance na pigtutubudang shabu na may gabat na nasa duwang gramos asin may street value na P13,600.
Nakumpiskar man an pigtutubudang dried marijuana leaves na may gabat na duwang gramos asin street value na P240, drug paraphernalia (improvised tooter asin aluminum foil), pitong pidasong bala nin Cal. 45 asin buy-bust money.
