LEGAZPI CITY-Nagbilog nin mga panibagong plano an US military ngani targeton an depensa kan Iran sa Strait of Hormuz enkaso dai madagos an ceasefire, susog sa mga report.
Kabale sa pigkokonsidera, iyo an mga pag-atake na nakasentro sa “dynamic targeting” sa kapasidad kan Iran sa palibot kan Strait of Hormuz, Southern Arabian Gulf asin Gulf of Oman.
Ipigladawan kan mga sources an potensiyal na mga pag-atake laban sa saradit na fast attack boats, pagtatanom kan mina sa mga barko asin iba pang asymmetric assets, na nakatabang sa Iran ngani epektibong masarado an mga pangenot na ruta sa kadagatan asin gamiton an mga ini laban sa Amerika.
Susog sa mga report, pwedisir na isunod kan US military an dating patanid ni US President Donald Trump na pagatake sa dual-use asin infrastructure targets, kaiba an energy facilities, ngani mapirit an Iran na makipagdiyalogo sa sainda.
Naenot nang nagpatanid si Trump na ipapadagos kan US an saindang combat operations kun warang diplomatikong resolusyon sa gera.
Saro pang opsyon na na-develop kan military planners, iyo an pag-target sa individual Iranian military leaders asin iba pang “obstructionists” sa laog kan rehimen, na susog sa US officials, aktibong pigraot an mga negosasyon, kaiba si Ahmad Vahidi, na nagseserbing Commander-in-Chief kan Islamic Revolutionary Guard Corps.
Dagdag pa kaini na an posibleng pag-target sa natatadang military capabilities kan Iran, kaiba an missiles, launchers, asin production facilities na dai nabuwag sa inisyal na bugso kan pag-atake kan US asin Israel.
