LEGAZPI CITY – Naghalangkaw an antas kan inflation rate sa rehiyon Bikol kan Enero 2025 kompara kan Disyembre kan nakaaging taon.
Segun sa datos na ipigheras ni Philippine Statistics Authority Regional Statistical Services Office V Officer in charge Ray F. Merjilla sa Bombo Radyo Legazpi na nahiling an pagtaas kan presyo kan produkto asin serbisyo sa rehiyon na nagrikas nin 3.2% ngonian na Enero 2025 kompara kan 3.1% kan Enero 2024.
Pangenot na rason kan mas halangkaw na rason kan inflation sa rehiyon kompara kan nakaaging taon iyo an paghalangkaw kan presyo kan food and non alcoholic beverages.
Kasabay man sa paghalangkaw kan antas kan inflation iyo an gulay partikular na an kamatis, sibulyas asin talong, produktong karne partikular na an mga pork products, sira partikular na an sapsap, siring man renta sa mga kaharongan kaiba na an kuryente asin tubig.
Pigtaram pa kan opisyal na nahilingan man kan ahensya nin mas mabantol na paghalangkaw nin inflation kan nakaaging bulan kompara kan nakaaging taon partikular na an clothing and footwear, health, asin recreation sports and culture.
Nairehistro man an marikas na pagbagsak kan presyo kan bagas kan nakaaging bulan kun saen igwa ining -6.3% na inflation rate.
Naitala man sa provincia kan Masbate an pinakahalangkaw na inflation rate sa mga provincia sa rehiyon Bicol na nag-abot sa 3.7% hale sa 3.5% kan Disyembre 2024 mantang an provincia kan Sorsogon man an nakapagrehistro nin hibabang inflation rate sa rehiyon na 2.5% hale sa 1.4 percent kan pareho man na peryodo.
Pagdoon ni Merjilla na kun ikokompara sa inflation rate kan Disyembre 2024, gabos na mga provincia sa rehiyon Bikol an nakapagrehistro nin mas halangkaw na inflation rate ngonian na bulan nin Enero.
