LEGAZPI CITY – Natapos na an anom sa walong permanent evacuation centers na ipigko-construir kan Department of Public Works and Highways (DPWH) bilang paghahanda sa mga posibleng kalamidad sa rehiyong Bicol.
Sa intrevista kan Bombo Radyo Legazpi ki DPWH Bicol information officer Lucy Castaneda, duwa na sana suboot an tinatrabaho sa ngonian partikular na sa Albay asin Camarines Sur.
Segun pa ki Castaneda, kompleto na sa amenities an duwang eskalon na center kun sain suway an banyo kan lalaki sa babayi, may kitchen area, may bastanteng suplay kan tubig asin kuryente, laundry area, bakanteng espasyo para sa play area asin iba pa.
Napag-aramang nag-aabot sa P330.98 million an kabilugang kantidad kan mga nasabing evacuation centers.
Kaibanan sa mga lugar na natindogan kan centers an Brgy. Tughan sa Juban, Sorsogon; Virac, Catanduanes; Provincial Capitol Compound sa Pili, Camarines Sur; Brgy. Sto. Domingo sa Vinzons, Camarines Norte; Brgy. Balading sa Malinao, Albay; Bulod sa San Pascual, Masbate; Tubog, Zone 1 sa Libon, Albay asin saro pang barangay sa Tinambac, Camarines Sur.
Mientras tanto, inasegurar ni Castaneda na harayo sa risk areas sa pagbaha asin pagrasay kan daga, an mga itinindog na evacuation centers kun sain nagsagibo muna nin soil exploration para sa seguridad kan posibleng evacuees.
