LEGAZPI CITY- Ipighayag kan hepe kan Daraga Municipal Police Station na igwa nin problema sa sistema kan pagresponde kan mga ambulansya kan Bicol Regional Teaching and Training Hospital (BRTHH.)
Sigon ki PCI Elcid Roldan, dae kaya tulos na nakaresponde an ambulansya sa nangyaring aksidente sa Brgy. Peñafrancia, banwaan kan Daraga kun sain nagbangga an bus sa kahoy nin acacia bandang alas 3:00 nin maagahon.
Kan mag-hagad suboot sinda nin asistensya sa nasambitan na ospital, dae nin abilableng drayber kun kaya nahaluyan antes na nakaabot sa pinangyarihan kan insidente an ambulansya.
Sinabi ni Roldan na ipiglunad na sana sa police mobil kan mga nagrespondeng tauhan kan saindang istasyon an mga nalugadan na pasahero.
Kaipuhan suboot ining tawanan nin atensyon huli ta dapat na 24 oras na abilable an ambulansya ngani na makasalbar pa nin buhay sa mga siring na pangyayari.
Mientrastanto, nagpatanid man an hepe na dae paggamiton na sangga an “wang-wang” ngani na dae mag-likay sa pagmamanehar nin ambulansya huli ta igwa man giraray nin paninimbagan an drayber kaini in kaso magkawsa nin aksidente sa tinampo.
