LEGAZPI CITY- Kinumpirmar kan kontrobersiyal na si Peter Joemel Advincula o alyas Bikoy an planong pagdalagan bilang Mayor kan banwaan nin Donsol Sorsogon.
Enot na nabisto si Bikoy sa “Ang Totoong Narcolist” videos kung sain inakusaran kaini si Presidente rodrigo Duterte asin mga taga-suporta na suboot nasa likod kan kalakaran kan iligal na droga sa nasyun.
Alagad kan maglunsar na nin imbestigasyon an Kongreso asin mga otoridad inako man kaini na gibo-gibo man sana an video asin an mga taga-oposisyon suboot an nagsugo saiya.
Sa intrevista kan Bombo Radyo Legazpi kay Bikoy, ngunyan na aldaw niya na isasangat an Certificate of Candidacy bilang independent candidate sa pagka-alkalde kan Donsol.
Segun kay Bikoy, an kamawotan na magkaigwa nin pagbabago sa banwaan an rason kung nata mawot na magdalagan bilang alkalde mantang pigpapasa-Diyos na sana kung manggagana o madadaog sa eleksyon.
Alagad aminado man ini na pinagklalaoman ng dakula an magiging epekto kan kinahampang na eskandalo sa “Ang Totoong Narcolist” videos sa posibleng maging resulta kan eleksyon.
Napag-araman na hasta sa ngunyan nagpapadagos man giraray an pagdangog kan kaso na pigkakahampang ni Bikoy huli sa pagpapaluwas kaini kan mga nasabing kontrobersiyal na videos.
