LEGAZPI CITY-Nagsagibo nin protesta ngonian an Alliance of Concerned Teachers (ACT) Bicol Union kasabay kan “Labor Day” kun sain pangapudan an P50,000 across-the-board salary increase sa rehiyon.
Segun ki Regional President of the Alliance of Concerned Teachers (ACT) Bicol Union Roque Augustus Lamadrid, sa intrevista kan Bombo Radyo Legazpi na pinaglalaban ninda an P1,200 na taas sa sahod kan mga obrero sa nacion, P50,000 across-the-board salary increase para sa mga paratukdo, asin an P26,000 na sahod para naman sa mga kawani kan gobierno.
Tinawan doon niya na padagos an saindang protesta para sa makatarungan na sahod para sa mga paratukdo huli ta matindi an inflation, padagos an paglangkaw kan mga babarakalon asin serbisyo arog kan wifi connection, kuryente, tubig mantang kadakol pang pig-kakaltas sa sainda.
Haros wara na suboot na matada sa saindang mga sahod orog na sa mga paratukdo na baon sa utang.
Idinagdag pa ni Lamadrid, na nagkukulang man an mga classroom, pasilidad, asin textbook ngonian sa lado kan edukasyon mantang nagkakaigwa na nin panibagong curriculum.
Ipighayag pa niya an suboot ratio sa kada classroom kun sain igwang 50 estudyante, siring man an mga admins na kadakol na task asin warang pigtataong overtime pay.
Kasabay kan saindang protesta, ipigdoon kan opisyal na basado sa Republic Act No. 4670 kan Magna Carta for Public School Teachers, dapat nasa anom na oras sana an pagtatrabaho kan mga paratukdo.
