LEGAZPI CITY—Katakod kan obserbasyon kan Labor Day ngunyan na Mayo 1, liwat na masagibo nin pagmartsa an grupong Kilusang Mayo Uno asin iba pang sektor nganing ipangapudan an mga presenteng pigkakahamapang na problema kan nacion.
Segun ki Kilusang Mayo Uno Secretary General, Anne Castillo, sa intrevista kan Bombo Radyo Legazpi, masagibo sinda nin mga aktibidad asin build ups urog na ngunyan na nagkaigwa nin krisis na pigkahampang kan mga obrero asin namamanwaan—siring kan dugang na sweldo, paghalangkaw kan presyo kan langis asin mga barakalon, giyera sa Middle East na nagin rason kun nata nagmahal an presyo kan mga produkto.
Sa nasabing paagi mawot kan grupo na ipahiling an saindang pagkadisgusto sa kawaran nin aksyon kan administrasyong Marcos.
Dugang niya na isasagibo an protesta sa kahalabaan kan España pasiring sa Mendiola sa Manila, magin sa Central Luzon, CALABARZON, Bicol, Negros, Cebu, Panay, asin Davao.
Target man kan grupo na nasa 10,000 na mga obrero an makikisumaro sa nasabing aktibidad magin an iba pang sektor.
Mientrastanto, pig-imbitaran man ni Castillo an gabos na obrero may panahon na magpartisipar sa protesta ngunyan na Mayo 1 nganing ipahiling sa gobierno an paglaom sa paagi kan pagkasararo mapadapit sa saindang manlaen-laen na pangapudan.
