LEGAZPI CITY- Planong iadaptar kan Probinsya kan Albay an citizens investments funds na presenteng pigpapaimplementar sa nasyon kan Japan.
Ini kasabay kan ginibong study tour asin lecture sa Japan na pig-atendiran kan 13 young leaders kun saen naging representante kan Albay an Provincial planning and development Officer kaini.
Segun kay Arnold Onrubia, an Albay provincial planning and development coordinator, pinahiling kan nasambitang nasyon an saindang mga best practices pag-abot sa renewable projects.
Mawot man kan opisyal na iadaptar sa Probinsya kan Albay an citizens investments funds kun saen an taong bayan an mainvest sa gobyerno para makapagpatugdok nin mga renewable energy plans.
Sarong hamon suboot an pag finance kan renewable projects alagad maikukonsiderar na magayon na plano para sa pagpapakarhay kan renewable energy sa nasyon asin sa Probinsya.
Segun pa sa opisyal, kinakaipuhan nin masusing pag-aadal asin koopersyon kan lambang saro sa pagresolbar kan problema sa kuryente sa Albay.
Mientrastanto, segun pa sa opisyal, may posibilidad man na magkaigwa nin sisterhood province agreement an Albay asin Akita Prefecture kan Japan para maisakatuparan an mga programa dapit sa renewable energy initiatives siring man sa mga pwedesir na suwestyon na mga lakdang katakod kan nasambitang proyekto.
