Albay SDO, preparado na sa posibleng epekto kan Severe Tropical Storm “Opong”

LEGAZPI CITY – Preparado na an Schools Division Office Albay mapadapit sa posibleng epekto kan Severe Tropical Storm “Opong”.

Segun ki Schools Division Office Albay Spokesperson Froilan Tena sa intrevista kan Bombo Radyo Legazpi na antes pa man an raot nin panahon, ipigsairarom na an pira sa mga teaching asin non-teaching personnel sa training mapadapit sa paghandle nin disaster bago, mantang, asin pagkatapos mangrapado.

May pigsusunod man sindang polisiya kun sain may mga focal person sa kada eskwelahan na kun sain kaya ninda na marespondehan an sarong angat o kadifisilan kun kinakaipuhan.

Nagtao na man na direktiba sainda si Department of Education Albay Schools Division Superintendent Nene Merioles manungod sa pagpapagamit kan mga eskwelahan bilang evacuation centers.

Pigtaram kan opisyal na kun pagbabasehan an understanding kan Local Government Unit asin kan Deped an dae dapat talaga piggagamit an eskwelahan bilang evacuation centers alagad huli man sa nakasanayan asin maray na koordinasyon an pigtutugutan na an paggamit kan mga classroom para sa mga evacuees.

Nasa manhamiento na man suboot an hurisdiksyon sa pagpreparar kan mga classroom urog na an mga eskwelahan na kalimitang nalulubog sa baha tuyong makusog an pag-uuran.

Piglinaw niya man na bako man suspendido an klase sa provincia kundi naglipat sana suboot ini sa alternative delivery mode kun sain may ipigpapadara na mga module asin worksheet sa mga estudyante mapadapit sa mga leksyon sa saindang eskwelahan.

Pagirumdom ni Tena sa mga magurang asin estudyante na gamiton na an oras na maray pa an kamugtakan kan panahon sa pagpreparar kan mga saindang mga gamit urog na an mga eskwelahan asin kaharongan na nakatugdok sa low lying areas.