Guminadan nin 19 katawo an inilansar na panibong air strikes kan Issrael sa Lebanon.
Basado sa Health Ministry kan Lebanon, nasa 10 sa mga nagadan, kabale an tulong joven asin tulong kababaihan, an nagadan sa sarong harong sa Deir Qanoun town.
An panibagong mga pagkagadan an nairehistro wara pang sarong semana makalihis i-anunsyar kan Amerika na nagkasundo ang Lebanon asin Israel na palawigon pa an ceasefire sa laog kan 45 aldaw mantang nakatalaang ipagpadagos kan duwang panig an pag-oolay puon sa Hunyo.
Sa ibong kan ceasefire extension, pareho man liwat na nagpapadagos nin paglansar nin pag-atake ang Israel asin Hezbollah partikular na sa may southern Lebanon.
Sa sarong statement, sinabi kan health ministry kan Lebanon na afuera sa mga nagadan sa Deir Qanoun, igwa man na tulong katawo an nairido kabale an sarong joven na babae.
Igwa man na siyam na katawo an nagadan asin 29 ang nairido sa air strikes kan Israel sa Nabatieh asin sa Tyre districts.
Sa pinakahuring report kan healh ministry, nagsakat na 3,000 katawo an numero kan nagadan sa Lebanon huli sa strikes kan Israel sa kasagsagan kan labanan sa pagultangan ninda kan Hezbollah puon kan Marso.
