Kumpiyansa si Manila 6th district Representative Bienvenido Abante Jr. na makakakuwa nin “more than enough” o labi pa sa one-third kan kinakaipuhan na boto hale sa mga miembros kan Kamara de Representantes nganing i-impeach si Vice President Sara Duterte.
Base ini sa resulta kan botohan kan enot na impeachment kan Bise Presidente.
Sa sarong pulong balitaan ngonian na Sabado, Pebrero 21, ipinaliwanag ni Abante na sa 311 na mga kongresista, 105 pabor na boto sana an kaipuhan, katampad nin one-third, nganing maipasar sa senado an impeachment complaint.
Dae man pignegaran kan mambabatas na igwa siyang kahandalan na posibleng padifisilan na makakuwa nin bastanteng boto enkaso maipasa sa senado an mga articles of impeachment laban sa Bise Presidente.
Segun ki Abante, kinakaipuhan nin 16 na affirmative votes gikan sa mga Senador nganing ma-convict an Bise Presidente.
Naglalaom an mambabatas na bako ini sarong “political ploy,” kundi pagbabasehan kan mga Senador an saindang mga desisyon sa ebidensya asin substansiya kan reklamong impeachment.
Mientrastanto, pigdoon man ni Abante an pagsunod kan Kamara de Representantes sa desisyon kan Korte Suprema sa pagkapot kan mga impeachment complaints laban ki Vice President Sara Duterte.
Kun saen, base suboot sa House Committee on Justice, igwa pa nin 10 session days nganing maibugtak sa Order of Business makalihis na ma-endorso o ma-transmit sa opisina kan House Speaker an mga impeachment complaints.
Segun ki Rep. Abante, posibleng umabot nin duwa hasta tolong aldaw an deliberasyon kan House Committee on Justice dapit sa impeachment complaints laban sa Bise Presidente antes ini dagos na maidara sa plenaryo kun saen kinakaipuhan an one-third na boto hale sa mga miembros kan Kamara nganing ma-impeach an ikaduwang pinakahalangkaw na opisyal kan nasyon.
Magigirumduman na saro si Abante sa mga nag-endorso kan ika-apat na impeachment complaint laban sa Bise Presidente na kinumpirmar ni House Secretary General Cheloy Garafil kan Huwebes, Pebrero 19 na naresibe na kan opisina ni House Speaker Bojie Dy.
