LEGAZPI CITY – Isasagibo ngonian na aldaw Sabado, Nobyembre 14, an Dugong Bombo 2026, an pambansang programa nin boluntaryong pagdonar nin dugo kan Bombo Radyo Philippines, sa pakikipagtabangan sa Bombo Radyo Philippines Foundation, Inc. asin Philippine Red Cross.
Sabay-sabay na isasagibo an aktibidad sa 25 na lugar sa bilog na Pilipinas, tanganing makadugang sa suplay nin dugo sa mga blood bank asin ospital asin makatabang sa mga pasyenteng nangangaipo kaini.
Sa parte kan Bombo Radyo Legazpi, nakatalaan na isagibo an bloodletting activity sa second level kan Pacific Mall Legazpi City, na piglalaomang partisiparan nin nasa 200 o labi pang blood donors.
Igwang temang “A Little Pain, A Life to Gain,” ipinapagirumdom kan programa na an sarong boluntaryong pagdonar nin dugo, posibleng magin paagi tanganing makasalbar nin buhay.
Sa laog nin labi 20 taon, padagos na nagin parte kan serbisyo publiko asin bolunterismo kan Bombo Radyo Philippines an Dugong Bombo, na ngunyan na taon kaiba man sa pagselebrar kan ika-60 anibersaryo kan himpilan.
Sa paagi kan programa, padagos na ineenganyar an publiko na makipartisipar sa nasabing blood-letting activity bilang konkretong paagi nin pagmalasakit asin pagtabang sa kapwa.
