Labing 40 pilot whales an nairehistrong nagadan makalihis ma-stranded sa sarong baybayon sa New Zealand kan nakaaging Huwebes.
Nahiling an sarong grupo nin mga pilot whale sa Ngawi coast harani sa Cape Palliser sa North Island, New Zealand, segun sa pahayag kan Department of Conservation (DOC) kan nacion.
Sa inisyal na bareta kan Project Jonah New Zealand, sarong environmental organization, labi 20 na balyena an naenot na na-stranded sa baybayon kun saen buhay pa an apat sa mga ini.
Dagdag pa kan organisasyon, nakikipagkoordinar na man ini sa mga ahensiya de gobyerno kan New Zealand, magin sa lokal na tribo kan Māori, tanganing magsagibo nin pag-ebakwar sa buhay pang mga balyena sa baybayon asin pagsusuri sa salud kan mga ini.
Alagad, kan nakaaging Biyernes, 43 na gadan na balyena an nadiskobre kan DOC sa sarong kilometrong kahalabaan kan baybayon na minapoon sa Ngawi hasta sa Mangatoetoe.
Segun sa DOC, pirang beses nang nai-stranded sa baybayon an nasambitang uri nin balyena alagad dae pa suboot malinaw an eksaktong kawsa kaini.
